അഭിപ്രായങ്ങളെയും വിമർശങ്ങളെയും തള്ളികളയാറില്ല.

ഒരു പോസ്റ്റിൽ അഭിപ്രായം രേഖപ്പെടുത്തുമ്പോൾ അർഹിക്കുന്ന മാന്യത നൽകി സഭ്യതയോടെ പറയാനുള്ള അന്തസ്സ് ഞാൻ പാലിക്കുന്നുണ്ട് എന്ന് തന്നെയാണ് എന്‍റെ വിശ്വാസം. ആക്ഷേപ ഹാസ്യത്തിലൂടെയായാലും കാര്യവിവരണ ബോധത്തിലൂടെയായാലും അതിലെ തെറ്റുകൾ ചൂണ്ടി കാണിച്ചാൽ, അത് ഉൾക്കൊള്ളാനുള്ള മിനിമം യോഗ്യതയെങ്കിലും ഒരു വ്യക്തിക്ക് ഉണ്ടാകുന്നത് നല്ലതാണ്. 

എനിയ്ക്ക് അഭിപ്രായങ്ങളെ തള്ളികളയാൻ അറിയില്ല,  അഭിപ്രായ വ്യത്യാസങ്ങളെ  ഉത്തരവാദിത്വത്തോടെ മാനിക്കുകയും അതിലെ നെല്ലും പതിരും വേർതിരിച്ചു പറഞ്ഞ അഭിപ്രായത്തോട് നീതി പുലർത്തുകയും ചെയ്യാറുണ്ട്. എല്ലാവരും ഒരുപോലെ ആകണമെന്നില്ലല്ലോ ? അങ്ങനെ ആയിരുന്നെങ്കിൽ എല്ലാ മനുഷ്യർക്കും ഒരേ മുഖ സാദൃശ്യം ഈശ്വരൻ നൽകുമായിരുന്നു. പലരുടെയും ചിന്തകളും അഭിപ്രായങ്ങളും ഒരേ തലത്തിൽ ആയിരിക്കില്ല എന്നതാണ് സത്യം.

ഉത്തരം മുട്ടുമ്പോൾ കൊഞ്ഞനം കുത്തി കാണിക്കുന്ന  നാലാംകിട രാഷ്ട്രീയക്കാരെ പോലെയാകരുത് നാം.  മനുഷ്യനായാൽ  ഒരിക്കലും അഭിപ്രായത്തെ തള്ളികളയാതിരിക്കുക. ഒരു വ്യക്തിയുടെ അഭിപ്രായത്തെ നിങ്ങൾക്ക് എതിർക്കാം പക്ഷെ ആ വ്യക്തിയുടെ അഭിപ്രായവും അത് പ്രകടമാക്കിയ അവകാശത്തെയും മാനിക്കാനുള്ള ഒരു മനസ്സുമാണ് സഹിഷ്ണുതയുള്ള ഒരു വ്യക്തിക്ക് ആദ്യം ഉണ്ടാകേണ്ടത് അതില്ലാത്തവർ വളരെ പ്രയാസപ്പെട്ട് തന്നെ അത് നേടിയെടുക്കുകയും വേണം.

കാള പെറ്റു എന്ന് കേൾക്കുമ്പോൾ തന്നെ കയറെടുക്കുന്ന ഇടുങ്ങിയ ചിന്താഗതിയിലേക്ക്  മലയാളി മനസ്സുകൾ അധഃപതിക്കരുതേ എന്നുമൊരു അപേക്ഷയുണ്ട്. ഈയിടെ  ഒരു അഭിപ്രായം പറഞ്ഞതിനെ തുടർന്ന് ഉണ്ടായ കോലാഹലങ്ങൾ കാണുകയും കേൾക്കുകയും ചെയ്യുമ്പോൾ ഒരു ദുഃഖം  അഭിപ്രായം പറഞ്ഞ വ്യക്തിക്കുമുണ്ടാകുന്നത് സ്വാഭാവികമാണ്. നിങ്ങൾക്ക് ഇഷ്ടപ്പെടാത്തതൊന്നും ഞാൻ പറയാൻ പാടില്ല എന്ന് നിങ്ങൾ പറയുന്നതാണ് അസഹിഷ്ണുത.  

എനിക്ക് ശരിയെന്ന് തോന്നുന്നതും തെറ്റെന്ന് തോന്നുന്നതും അത്  എന്ത് തന്നെയായാലും ഞാൻ പ്രകടിപ്പിക്കും. ജാസ്‌ത്യാലുള്ളത് തൂത്താൽ പോകില്ലല്ലോ (ജന്മസിദ്ധമായി കിട്ടിയതാണേ അല്ലാതെ ഇന്നലെ മുറ്റത്ത് മുള്ളിയപ്പോൾ തെറിച്ചു വീണ് കിട്ടിയതല്ല.) ഓരോ വ്യക്തിക്കും സഭ്യമായി അന്തസ്സോടെ ഏതൊരു അഭിപ്രായവും ഏതൊരു രീതിയിലും രേഖപ്പെടുത്താം എന്ന് വിശ്വസിക്കുന്നു ഞാനും ഈ ജനാധിപത്യ രാജ്യത്തിലെ ഒരു പൗരൻ ആണ്. പറഞ്ഞ അഭിപ്രായത്തോട് നീതിപുലർത്താൻ കഴിയാതെ ആ വ്യക്തിയെ കരുവാക്കി കൂട്ടമായി വേട്ടയാടപ്പെടുന്ന രീതി കാണുമ്പോൾ പുച്ഛമാണ് തോന്നുന്നത്. എല്ലാം അഭിപ്രായങ്ങളും  തുറന്ന മനസ്സോടെ കേൾക്കാൻ നമുക്ക് കഴിയണം അവിടെയാണ് സഹിഷ്ണുത.